ඉන්දීය විදේශ ඇමති සහ UN මහලේකම් අතර විශේෂ හමුවක්

ඉන්දීය විදේශ කටයුතු අමාත්‍ය එස්. ජයිශංකර් සහ එක්සත් ජාතීන්ගේ මහලේකම් අතර විශේෂ සාකච්ඡාවක් නිව්යෝර්ක් නුවරදී පැවැත්විණි.

විදෙස් මාධ්‍ය වාර්තා කරන්නේ, ලෝක දේශපාලනයේ පවතින ගෝලීය ගැටලු සහ ඉන්දියාව හා එක්සත් ජාතීන්ගේ සංවිධානය අතර ද්විපාර්ශ්වික සබඳතා තවදුරටත් ශක්තිමත් කරගැනීම පිළිබඳව එහිදී සාකච්ඡා කර ඇති බවය. 

මෙම සංචාරය අතරතුරදී, 2028-29 ධුර කාලය සඳහා එක්සත් ජාතීන්ගේ ආරක්ෂක කවුන්සිලයේ නිත්‍ය නොවන සාමාජිකත්වයක් වෙනුවෙන් තරඟ වැදීමේ ඉන්දීය නිල මැතිවරණ ප්‍රචාරක ව්‍යාපාරය ද විදේශ අමාත්‍යවරයා විසින් නිල වශයෙන් ආරම්භ කර ඇත.

ලෝකය පුරා ගැටුම් සහ අස්ථාවරත්වයන් දරුණු ලෙස ඉහළ යමින් පවතින මෙවැනි වටපිටාවක එක්සත් ජාතීන්ගේ සංවිධානයේ භූමිකාව වෙනදාටත් වඩා තීරණාත්මක වී ඇති බැවින්, ඉන්දියාවේ මෙම ඉදිරිපත් වීම ඉතා සුදුසුම කාලයක සිදුවන්නක් බව ඔහු පෙන්වාදී තිබේ.

එක්සත් ජාතීන්ගේ මූලස්ථානයේදී අදහස් දැක්වූ අමාත්‍ය ජයිශංකර්, ගෝලීය අභියෝග ජයගැනීම සඳහා ඉන්දියාව සතු දැක්ම සහ ජාත්‍යන්තර සාමය වෙනුවෙන් ඉතිහාසය පුරා ඉන්දියාව ඉටුකළ මෙහෙවර පදනම් කරගනිමින් සෙසු සාමාජික රටවල් ඉන්දියාවේ අපේක්ෂකත්වය ඇගයීමට ලක් කරනු ඇතැයි විශ්වාසය පළ කළේය.