පස් දෙනෙකුට දිවි අහිමිකළ කටුවාන ගින්නේ සම්පූර්ණ විස්තරය
July 21, 2026 09:08 pm
හෝමාගම, කටුවාන කර්මාන්තපුරයේ ගින්නක් හටගත් කර්මාන්තශාලාව 2024 වසරෙන් පසු පරිසර ආරක්ෂණ බලපත්රය යාවත්කාලීන කර නොමැති බවත්, හදිසි තත්ත්වයකට මුහුණදීම සඳහා සැලැස්මක් පවා සකස් කර නොතිබූ බවත් මධ්යම පරිසර අධිකාරිය පවසයි.
2010 වසරේ ආරම්භ කර ඇති මෙම කර්මාන්තශාලාවට 2024 වසරෙන් පසු පරිසර ආරක්ෂණ බලපත්රය යාවත්කාලීන කර නොමැති බව මධ්යම පරිසර අධිකාරිය තහවුරු කර තිබේ.
කර්මාන්තශාලාවේ නිෂ්පාදන කටයුතු සඳහා භාවිත කරන PVC ඇතුළු රසායනික ද්රව්ය ගිනිගැනීමකදී මිනිස් සිරුරට අහිතකර රසායනික සංයෝග ඇති කළ හැකි බැවින්, පරිසර ආරක්ෂණ බලපත්රය නිකුත් නොකිරීමට එයද එක් හේතුවක් වී ඇති බව සඳහන් වේ.
එමෙන්ම, පරිසර ආරක්ෂණ බලපත්රය ලබාගැනීම සඳහා සපුරාලිය යුතු නිර්ණායක වන ශබ්ද හා වායු තත්ත්ව විශ්ලේෂණ වාර්තා සහ අපද්රව්ය බැහැර කිරීමේ වාර්තාවක්ද අදාළ කර්මාන්තශාලාව විසින් මධ්යම පරිසර අධිකාරිය වෙත ඉදිරිපත් කර නොමැති බව එහි නිලධාරියෙකු සඳහන් කළේය.
හදිසි තත්ත්වයකට මුහුණදීම සඳහා අවශ්ය සැලැස්මක්ද කර්මාන්තශාලාව විසින් සකස් කර නොතිබූ බව මධ්යම පරිසර අධිකාරිය පවසයි.
අදාළ නිර්ණායක සම්පූර්ණ කර පරිසර ආරක්ෂණ බලපත්රය ලබාගන්නා ලෙස අවස්ථා කිහිපයකදී කර්මාන්තශාලා පාලනාධිකාරියට දැනුම් දී ඇති අතර, අවසන් වරට පසුගිය ජූලි 2 වනදාද ඒ සම්බන්ධයෙන් සිහි කැඳවීමක් සිදුකර ඇති බව වාර්තා වේ.
හෝමාගම, කටුවාන කර්මාන්තපුරයේ ආරක්ෂිත හිස්වැසුම් නිෂ්පාදන කර්මාන්තශාලාවක අද පෙරවරුවේ හටගත් ගින්නකින් පුද්ගලයන් පස්දෙනෙකු ජීවිතක්ෂයට පත්ව තිබුණි.
ගින්න හටගන්නා අවස්ථාවේ කර්මාන්තශාලාව තුළ සේවකයන් 80කට අධික පිරිසක් සිට ඇති බව වාර්තා වේ.
පෙරවරු 9.50ට පමණ හටගත් ගින්න පසුව ශීඝ්රයෙන් කර්මාන්තශාලාව පුරා පැතිර ගොස් ඇති අතර, අවට ප්රදේශය ඝන කළු දුමාරයකින් වැසී ගොස් තිබිණි.
ගින්න පාලනය කිරීම සඳහා කොළඹ, කෝට්ටේ, දෙහිවල–ගල්කිස්ස මහ නගර සභාවල මෙන්ම හොරණ නගර සභාවේ සහ ශ්රී ලංකා ගුවන් හමුදාවේ ගිනි නිවීමේ රථද යොදවා තිබුණි.
පැය කිහිපයක මෙහෙයුමකින් අනතුරුව ගින්න පාලනය කිරීමට ගිනි නිවන භටයන් සමත් විය.
පොලිසිය සිදුකළ මූලික විමර්ශනවලදී සැක පළ කර ඇත්තේ කර්මාන්තශාලාවේ අභ්යන්තරය සිසිල් කිරීම සඳහා යොදා තිබූ විදුලි පංකාවක සිදුවූ විදුලි කාන්දුවක් ගින්නට හේතු වන්නට ඇති බවයි.
ගින්න හටගන්නා අවස්ථාවේ ආරක්ෂිත හිස්වැසුම් නිෂ්පාදනය සඳහා භාවිත කරන PVC ඇතුළු රසායනික ද්රව්ය විශාල ප්රමාණයක් කර්මාන්තශාලාව තුළ ගබඩා කර තිබූ බවද අනාවරණ වී ඇත.
ගින්නෙන් පසු අපරාධ ස්ථාන පරීක්ෂණ නිලධාරීන් සහ හෝමාගම වැඩබලන මහේස්ත්රාත් රොෂාන් කුරුප්පුආරච්චි මහතා එම ස්ථානය නිරීක්ෂණය කළහ.
ගින්නෙන් ජීවිතක්ෂයට පත්වූවන් සිටි බවට අනාවරණ වූ කර්මාන්තශාලාවේ ඉහළ මහලට වැඩබලන මහේස්ත්රාත්වරයා සහ පොලිස් නිලධාරීන් ළඟා වී ඇත්තේ බූම් ට්රක් රථයක ආධාරයෙනි.
මේ අතර, කටුවාන කර්මාන්තශාලාවේ ඇති වූ ගින්න සම්බන්ධයෙන් පූර්ණ විමර්ශනයක් සිදුකර වාර්තාවක් ලබාදෙන ලෙස කම්කරු නියෝජ්ය අමාත්ය මහින්ද ජයසිංහ මහතා කම්කරු දෙපාර්තමේන්තුවේ නිලධාරීන්ට උපදෙස් ලබාදී තිබේ.
එම විමර්ශනයේදී ගින්නට හේතු වූ කරුණු, කර්මාන්තශාලාවේ ගිනි ආරක්ෂණ සහ වෘත්තීය සුරක්ෂිතතා ප්රමිතීන්, සේවක ආරක්ෂාව සඳහා අවශ්ය පහසුකම් සහ හදිසි ගැලවීමේ ක්රමවේද ඇතුළු කරුණු පිළිබඳව අවධානය යොමු කිරීමට නියමිතය.
