මහජන ආරක්ෂක අමාත්යාංශයේ ලේකම් වරද පිළිගනී
July 9, 2026 03:45 pm
බීමතින් රිය පදවා අනතුරක් සිදුකිරීමේ සිද්ධියකට අදාළව තමන්ට එරෙහිව ගොනු කර ඇති නඩුවේ එක් චෝදනාවකට, මහජන ආරක්ෂක අමාත්යාංශයේ වත්මන් ලේකම් සහ විශ්රාමික ජ්යේෂ්ඨ නියෝජ්ය පොලිස්පති රවී සෙනෙවිරත්න මහතා අධිකරණය හමුවේ වරද පිළිගෙන තිබේ.
2023 වසරේ වැල්ලවත්ත මුහුදුබඩ මාර්ගයේදී (Marine Drive) සිදුවූ මෙම රිය අනතුරට අදාළව, 'රිය අනතුරක් වළක්වා නොගැනීම' යන පළමු චෝදනාවට ඔහු මෙලෙස වරද පිළිගන්නා ලදී. ඒ අනුව, ගල්කිස්ස මහෙස්ත්රාත් කාංචනා නෙරංජලා සිල්වා මහත්මිය විසින් ඔහුට රුපියල් 2,500ක දඩ මුදලක් ගෙවන ලෙස නියෝග කළාය.
රවී සෙනෙවිරත්න මහතා වෙනුවෙන් අධිකරණය හමුවේ පෙනී සිටි නීතිඥවරුන් වන චන්දන පෙරේරා, ගීත්ම ප්රනාන්දු සහ අජිත් නන්දකුමාර යන මහත්වරුන් විසින්, සිය සේවාදායකයා අදාළ පළමු චෝදනාවට වරද පිළිගන්නා බව අධිකරණයට දැනුම් දෙන ලදී.
පළමු චෝදනාව සම්බන්ධයෙන් දඬුවම් නියම කිරීමට මෙන්ම, නඩුවේ දෙවන සහ තෙවන චෝදනා වන 'අපරීක්ෂාකාරීව රිය පැදවීම' සහ 'බීමත්ව රිය පැදවීම' යන චෝදනා ඉදිරියට පවත්වාගෙන යනවාද නැද්ද යන්න සම්බන්ධයෙන් තීන්දුව ප්රකාශ කිරීම සඳහා මෙම නඩුව අද (9) දින කැඳවා තිබුණි.
කෙසේ වෙතත්, එම ඉතිරි චෝදනා (දෙවන සහ තෙවන) සම්බන්ධයෙන් නඩුව විභාගයට ගැනීමට සහ අද දින නියම කරන ලද රුපියල් 2,500ක දඩ මුදල ගෙවීම සඳහා මෙම නඩුව ලබන අගෝස්තු මස 20 වැනිදා යළි කැඳවීමට ගල්කිස්ස මහෙස්ත්රාත්වරිය වැඩිදුරටත් නියෝග කර ඇත.
