ජානක පෙරේරා ඝාතන සිද්ධියේ විත්තිකරුට පැනවූ ජීවිතාන්තය දක්වා සිරදඬුවම ශ්රේෂ්ඨාධිකරණයත් තහවුරු කරයි
June 30, 2026 06:02 pm
2008 වසරේ අනුරාධපුරයේදී විශ්රාමික යුද හමුදා මේජර් ජෙනරාල් ජානක පෙරේරා, ඔහුගේ බිරිඳ සහ තවත් පිරිසක් මරාගෙන මැරෙන බෝම්බ ප්රහාරයකින් ඝාතනය කිරීමේ සිද්ධියට අදාළ නඩුවෙන් වරදකරු වූ විත්තිකරුවකුට අනුරාධපුර මහාධිකරණය විසින් පැනවූ ජීවිතාන්තය දක්වා වූ සිරදඬුවම ශ්රේෂ්ඨාධිකරණය විසින් තහවුරු කර තිබේ.
ඒ අනුව ජීවිතාන්තය දක්වා සිරදඬුවම් නියම වී සිටි උමාර් හතාප් නමැති විත්තිකරු විසින් ඉදිරිපත් කළ අභියාචනයක් නිෂ්ප්රභ කරමින් ශ්රේෂ්ඨාධිකරණය මෙම නියෝගය නිකුත් කර ඇත.
මෙම පෙත්සම ශිරාන් ගුණරත්න සහ මේනකා විජේසුන්දර යන මහත්ම මහත්මීන්ගේ සමන්විත ශ්රේෂ්ඨාධිකරණ විනිසුරු මඩුල්ල ඉදිරියේ සලකා බැලුණි.
එහිදී අභියාචක විත්තිකරුගේ නීතිඥවරයා සහ නීතිපතිවරයා වෙනුවෙන් නියෝජ්ය සොලිසිටර් ජෙනරාල් සුදර්ශණ ද සිල්වා සමඟ පෙනී සිටි අතිරේක සොලිසිටර් ජෙනරාල් හරිප්රියා ජයසුන්දර මහත්මිය ඉදිරිපත් කළ කරුණු සලකා බැලීමෙන් අනතුරුව ශ්රේෂ්ඨාධිකරණ විනිසුරු මඩුල්ල විසින් අදාළ අභියාචනා පෙත්සම ප්රතික්ෂේප කරනු ලැබීය.
2008 වසරේ ඔක්තෝබර් මස 06 වනදා අනුරාධපුරයේදී එක්සත් ජාතික පක්ෂයේ දේශපාලන කාර්යාලයක් විවෘත කිරීම සිදුවූ අවස්ථාවේ එල්ල වූ මරාගෙන මැරෙන බෝම්බ ප්රහාරයකින් විශ්රාමික යුද හමුදා මේජර් ජෙනරාල් ජානක පෙරේරා, ඔහුගේ බිරිඳ ඇතුළු පිරිසක් ඝාතනයට ලක්වී තවත් පිරිසක් තුවාල ලැබීය..
එම සිද්ධිය සම්බන්ධයෙන් නීතිපතිවරයා ඇතුළු විත්තිකරුවන් පිරිසකට එරෙහිව අනුරාධපුර මහාධිකරණය හමුවී අධි චෝදනා ගොනු කළේය.
එම චෝදනාවලට වරදකරු කෙරුණු මෙම විත්තිකරුට අනුරාධපුර මහාධිකරණය විසින් ජීවිතාන්තය දක්වා සිරදඬුවම් නියම කළ අතර එම දඬුවම අභියෝගයට ලක් කරමින් ඔහු විසින් අභියාචනාධිකරණයට ඇපෑලක් ඉදිරිපත් කළේය.
එම ඇපෑල විභාග කළ අභියාචනාධිකරණය එය නිෂ්ප්රභ කරමින් විත්තිකරුට මහාධිකරණය විසින් පැනවූ ජීවිතාන්තය දක්වා වූ සිර දඬුවම තහවුරු කරනු ලැබීය.
තමන්ව වරදකරුකරමින් මහාධිකරණය සහ අභියාචනාදිකරණය දුන් තීන්දු ඉවත්කොට එම චෝදනාවලින් තමන්ව නිදොස් කොට නිදහස් කරන ලෙස ඉල්ලා අදාල විත්තිකරු විසින් ශ්රේෂ්ඨාධිකරණයට මෙම විශේෂ අභියාචනය ඉදිරිපත් කර තිබුණි.
