සියයට 15 ඉක්මවූ බස් ගාස්තු වැඩිවීමක් බලාපොරොත්තු වෙනවා - ගැමුණු

වාර්ෂික බස් ගාස්තු සංශෝධනය එළඹෙන ජුලි මස පළමු වන දින සිට සිදුකරන ලෙස පුද්ගලික බස් සංගම් විසින් ජාතික ගමනාගමන කොමිෂන් සභාව වෙත ඉල්ලීමක් ඉදිරිපත් කළ බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පවසයි.

ඊයේ (24) දිනයේ දී එම ඉල්ලීම ලිඛිතව සිදුකළ බව ඒ මහතා පැවසීය.

මාධ්‍ය වෙත අදහස් දක්වමින් ඒ මහතා පැවසුවේ ඉදිරි දින පහ තුළ ගාස්තු සංශෝධනය පිළිබඳ ජාතික ගමනාගමන කොමිෂන් සභාව සමග සාකච්ඡා කිරීමට ද අපේක්ෂා කරන බවය.

"අපි බලාපොරොත්තු වෙනදා 15% ත් 20%ත් අතර පරාසයක වැඩිවීමක්. පහුගිය දින කිහිපයම අපි පාඩුවට දිව්වේ. ඩොලර් එක සහ අනිත් පිරිවැය සියල්ල වැඩි වෙලා තියෙනවා. බස්  කාර්මාන්තය බරපතළ අර්බුදයක තියෙන්නේ. මාසයක් අපි ධාවනය කළේ අමාරුවෙන්. ඉදිරියේ මාස 6ක් තුල ඩීසල් මිල අඩු වුනත් අපි බස් ගාස්තු අඩු කරන්නේ නෑ කියලා තීරණය කළා. "

"බස් ගාස්තු අවස්ථා 300 ගානක් තියෙනවා ඒ සියල්ල්ම වැඩි වෙනවා. සංශෝධනයක් නෙමෙයි වැඩි වෙනවා. අපේ බලාපොරොත්තුව අවම ගාස්තුව රුපියල් 35ක් 40ක් වත් වෙයි කියලා."