ඩුබායිවලින් පිටුවහල් කළ ප්රබල පාතාල නායකයන් දෙදෙනාගේ තොරතුරු රැසක් හෙළිවෙයි
June 14, 2026 07:51 pm
එක්සත් අරාබි එමීර් රාජ්ය විසින් මෙරටට පිටුවහල් කළ අපරාධ කල්ලි නායක බ්ලූමැන්ඩල් සංඛ සහ මෝදර චතුර ගැන තොරතුරු රැසක් මේ වන විට පොලීසිය විසින් අනාවරණය කර තිබේ.
මෙරට තුළ සංවිධානාත්මක අපරාධ සහ මත්ද්රව්ය ජාවාරම් හා සම්බන්ධ බ්ලූමැන්ඩල් සංඛ සහ මෝදර චතුර පසුගියදා එක්සත් අරාබි එමීර් රාජ්ය ආරක්ෂක අංශ විසින් අත්අඩංගුවටගෙන තිබුණේ එරට අබුඩාබි නුවර රැඳීසිටියදීය.
ඒ මැදපෙරදිග යුද්ධයට අදාළව ඉරානය විසින් එක්සත් අරාබි එමීර් රාජ්යට සිදුකළ පහරදීම් වලට අදාළ දර්ශන සහ ඡායාරූප සිය ජංගම දුරකථන තුළ තබාගෙන සිටීම සම්බන්ධයෙනි.
දින කිහිපයක් එරට බන්ධනාගාරයක රඳවා තබා එරටින් පිටුවහල් කළ සැකකරුවන් දෙදෙනා රැගත් එයාර් ඒෂියා ගුවන් සේවයට අයත් ගුවන් යානය ඊයේ (13) රාත්රියේ කටුනායක බණ්ඩාරනායක ජාත්යන්තර ගුවන් තොටුපොළට ළඟාවිය.
එහිදී සැකකරුවන් දෙදෙනා ගුවන් තොටුපොළ අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගැනුණි.
මෙලෙස අත්අඩංගුවට ගත් සැකකරුවන් දෙදෙනා අතරින් 40 හැවිරිදි බ්ලූමැන්ඩ්ල් සංඛ මෙරට තුළ සිදුවූ සංවිධානාත්මක අපරාධ ක්රියාකාරකම් රැසකට අදාළව පොලීසියට අත්යවශ්යව සිටි සැකකරුවෙකි.
ඔහු 2015 වසරේ කොළඹදී වෙඩි තබා මනුෂ්ය ඝාතනයක් සිදුකිරීම, 2016 වසරේ මාළිගාවත්ත ප්රදේශයේදී බන්ධනාගාර බස් රථයකට වෙඩි තැබීමේ සිද්ධියට ආධාර අනුබලදීම, 2018 වසරේ ග්රෑන්ඩ්පාස් පොලිස් වසමේ පිස්තෝල අවියකින් වෙඩි තබා පුද්ගලයෙකු ඝාතනය කර තවත් තිදෙනෙකුට බරපතල තුවාල සිදුකිරීම ඇතුළු අපරාධ සිදුවීම් රැසක සැකකරුවෙකු බව පොලීසිය පවසයි.
ඔහු සම්බන්ධයෙන් 2022 වසරේ සිට අපරාධ ක්රියාකාරකම් වාර්තා වී නොතිබුණද, ඊට පෙර සංවිධානාත්මක අපරාධ ක්රියාකාරකම්වලට සම්බන්ධවීමෙන් පසු රටින් පලා ගොස් සිට ඇති බව වාර්තා වේ.
අත්අඩංගුවටගත් බ්ලූමැන්ඩල් සංඛ නැමැත්තාගෙන් ගුවන් තොටුපොළ අපරාධ පරීක්ෂණ දෙපාර්තමේන්තුවේ නිලධාරීන් ප්රකාශ සටහන් කරගැනීමෙන් පසු වැඩිදුර විමර්ශන සඳහා ඔහුව කොළඹ උතුර කොට්ඨාස අපරාධ කාර්යංශය වෙත රැගෙන ගොස් තිබේ.
අත්අඩංගුවට ගැනුණු අනෙක් සැකකරු වන චතුර දිල්රුක්ෂාන් හෙවත් මෝදර චතුර සිය සහෝදරයා වන මෝදර නිපුනගේ මත්ද්රව්ය ජාවාරම් ජාලය මෙහෙයවූ පුද්ගලයා බවට හඳුනාගෙන ඇත.
අබුඩාබි නුවර පැවති සාදයක් අතරතුර මොහු අත්අඩංගුවටගෙන ඇති බව වාර්තා වේ.
ඔහු 2019 වසරේ ගංජා සන්තකයේ තබා ගැනීමෙ සිදුවීමක් සම්බන්ධයෙන් අත්අඩංගුවට පත්ව ඇති අතර 2020 වසරේ මෝදර පොලීසියට වාර්තා වූ පොල්ලකින් හා උල් ආයුධයකින් පහරදී තුවාල සිදු කිරීම පිළිබඳ නඩුවක සැකකරුවෙකු ද වේ.
එසේම 2022 වසරේ නොවැම්බර් මස කොළඹ අංක 04 මහෙස්ත්රාත් අධිකරණයෙන් වරේන්තුවක් ද මෝදර නිපුන් නැමැත්තාට එරෙහිව නිකුත් කර තිබේ.
ගුවන් තොටුපොළ අපරාධ පරීක්ෂණ දෙපාර්තමේන්තුවේ නිලධාරින් විසින් සැකකරුගෙන් ප්රකාශ සටහන් කරගැනීමෙන් පසු වැඩිදුර විමර්ශන සඳහා ඔහුව මධ්යම අපරාධ විමර්ශන කාර්යාංශය වෙත භාරදෙනු දී ඇත.
අනතුරුව මෝදර චතුර නාරාහේන්පිට මධ්යම අපරාධ විමර්ශන කාර්යාංශය වෙත රැගෙනවිත් තිබේ.
සැකකරු සම්බන්ධයෙන් වැඩිදුර විමර්ශන ජ්යෙෂ්ඨ නියෝජ්ය පොලිස්පති රන්මල් කොඩිතුවක්කු මහතාගේ උපදෙස් පරිදි, නියෝජ්ය පොලිස්පති චන්දන කොඩිතුවක්කු සහ ජ්යෙෂ්ඨ පොලිස් අධිකාරි කමල් ආරියවංශ යන මහත්වරුන්ගේ මෙහෙයවීම යටතේ සිදුකිරීම නියමිතය.
මේ අතර මෝදර චතුර නැමැත්තා අත්අඩංගුවට පත්වීමේ පුවත සැලවීමත් සමග මෝදර විදීවල රතිඤ්ඤා දැල්වූ බව වාර්තා වේ.
