ඉම්රාන් ඛාන්ගේ තත්ත්වය දැක ලොව පුරා ක්රිකට් තරු කම්පාවෙයි
February 18, 2026 09:16 pm
සිරගත කර සිටින පාකිස්තාන හිටපු අග්රාමාත්ය මෙන්ම හිටපු ක්රිකට් නායක ඉම්රාන් ඛාන් වෙනුවෙන් ලොව පුරා හිටපු ක්රිකට් නායකයින් 14 දෙනෙකු පාකිස්තාන අගමැති ෂෙබාස් ෂරීෆ් වෙත ලිපියක් යොමුකර තිබේ.
ඉම්රාන් ඛාන්ගේ සෞඛ්ය වෙනුවෙන් ලබාදෙන අවම පහසුකම් පිළිබඳව දැඩි කනස්සල්ල පළ කරමින් ඔවුන් අදාළ ලිපිය යොමුකර ඇත.
එහි ඔවුන් ඉල්ලා ඇත්තේ ඉම්රාන් ඛාන්ට "ගෞරවයෙන් හා මූලික මානව අයිතිවාසිකම් පිළිබඳ සැලකිල්ලෙන්" කටයුතු කරන ලෙසය.
බන්ධනාගාරයේ දී ඉම්රාන් ඛාන්ට අවම වෛද්ය පහසුකම් හෝ නොලැබෙන බව ඛාන්ගේ පවුලේ අය පවසන අතර, මේ වනවිට ඔහුගේ එක් ඇසක් සම්පූර්ණයෙන්ම පාහේ අන්ධ වී ඇති බවට වාර්තා වේ.
ලොව පුරා ක්රිකට් ක්රීඩකයන්ගේ දැඩි කනස්සල්ලට හේතු වී ඇත්තේ ද ඛාන්ගේ ඇසක් මෙලෙස සම්පූර්ණයෙන්ම නොපෙනෙන බවට පලවූ වාර්තාවත් සමග බව සඳහන්ය.
ක්රිකට් පිටියේ හිටපු වඩාත් ගෞරවනීය නායකයෙකු මෙන්ම ඉම්රාන් ඛාන්ගේ සමකාලීනයෙකු වන ග්රෙග් චැපල් විසින් අදාල ලිපිය සකසා තිබේ.
ඊට මයිකල් ඇතර්ටන්, ඇලන් බෝඩර්, මයිකල් බ්රියර්ලි, ග්රෙග් චැපල්, ඉයන් චැපල්, බෙලින්ඩා ක්ලාක්, සුනිල් ගවස්කාර්, ඩේවිඩ් ගවර්, කිම් හියුස්, නසාර් හුසේන්, ශ්රීමත් ක්ලයිව් ලොයිඩ්, කපිල් දේව්, ස්ටීවන් වෝ, ජෝන් රයිට් යන හිටපු ක්රිකට් ක්රීඩකයෝ අත්සන් තබා ඇත.
