පුංචි ඡන්දයේ ප්‍රතිඵලය නිකුත් වෙන්නේ මෙහෙමයි
May 2, 2025 12:09 pm
මෙවර පළාත් පාලන මැතිවරණයට අදාළ ඡන්ද විමසීමේදී ඡන්ද ගණන් කිරීමේ කටයුතුද එම මධ්‍යස්ථානයේදීම සිදුකරන බව මැතිවරණ කොමිෂන් සභාවේ සභාපති ආර්.එම්.ඒ.එල්. රත්නායක මහතා පවසයි.
අද දෙරණ Big Focus වැඩසටහන සමග අද (02) දිනයේ සජීවි වැඩසටහනකට එක්වෙමින් සභාපතිවරයා පැවසුවේ මේ සඳහා පියවර කිහිපයක් අනුගමනය කරන බවය.
සභාපතිවරයා පැවසුවේ මෙවර පළාත් පාලන මැතිවරණය කොට්ඨාස ක්‍රමයට පැවැත්වෙන බැවින් ඒ ඒ පළාත් පාලන ආයතන සතුව කොට්ඨාස කිහිපයක් බෙදී ඇති බැවින් ඒ එම ඡන්ද මධ්‍යස්ථානයේ දුර සහ පිහිටීම අනුව ඡන්ද ගණනය කිරීම සඳහා මෙම පියවරයන් ගෙන ඇති බවය.
මේ සම්බන්ධව වැඩිදුරටත් අදහස් දැක්වූ මැතිවරණ කොමිෂන් සභාවේ සභාපතිවරයා,
"එකක් තමයි එක කොට්ඨාසයක් ඇතුලේ තියන්නේ එක ඡන්ද මධ්‍යස්ථානයක් නම් අනිවාර්යයෙන්ම ඒ ඡන්ද මධ්‍යස්ථානයේ ඡන්ද ගණන් කිරීම සිදුකරනවා. ප්‍රතිඵලය ඒ ස්ථානයේදීම ප්‍රකාශයට පත් කරනවා. තවත් ක්‍රමයක් තියෙනවා. එක කොට්ඨාසයක් ඇතුළේ ඡන්ද මධ්‍යස්ථාන කිහිපයක් තියෙනවානම් සමහර ස්ථානවල ඡන්ද පොලේදීම ඡන්දය ගණන් කරනවා. ඡන්දය ගණන් කරලා ප්‍රතිඵල ලේඛණය පමණක් අර කොට්ඨාසයේ තියෙන ප්‍රතිඵල ප්‍රකාශ කිරිමේ ප්‍රධාන මධ්‍යස්ථානයට ගෙන එනවා. තවත් එක ක්‍රමයක් තියෙනවා කොට්ටාසය ඇතුළේ තියන සියලුම ඡන්ද පෙට්ටි පස්වරු 4න් පස්සේ අර ප්‍රතිඵළ නිකුත් කරන මධ්‍යස්ථානයට රැගෙන එනවා. ඒ රැගෙන ඇවින් වෙන වෙනම ගණන් කරලා ඒ මධ්‍යස්ථානයේදී කොට්ඨාසයේ ප්‍රතිඵලය සකස් කරනවා.
මේ සඳහා විශේෂ නිලධාරියෙක් අපි නම් කරලා තියෙනවා කොට්ඨාස තේරීම් භාර නිලධාරී කියලා. එයාට තමයි සම්පූර්ණ වගකීම තියෙන්නේ මෙතනදි. ඒ වගේම ඡන්ද ගණන් කිරීමේ මධ්‍යස්ථානයේදී සම්පූර්ණ වගකීම තියෙන්නේ ප්‍රධාන ඡන්ද ස්ථානාධිපතිවරයාට.
කොට්ඨාසයේ තියෙන ප්‍රතිඵල නිකුත් කරන මධ්‍යස්ථානයේදී ඒකේ කොට්ඨාසයේ අවසන් ප්‍රතිඵලය නිකුත් කරනවා. එතැනදි වෙන්නේ ඒ ඒ කොට්ඨාසයේ වැඩිපුර ඡන්ද ලබාගත්තු දේශපාලන පක්ෂය හෝ ස්වාධීන කණ්ඩායම නම් කරනවා. ඒක සිදු කෙරෙන්නේ ඒ ඡන්ද මධ්‍යස්ථානයේදීමයි. ඉන් අනතුරව එහි එක පිටපතක් ප්‍රදර්ශනය කරනවා එතන ඉන්න අයගේ දැන ගැනීම සඳහා. ඉන් අනතුරු කලාපය භාර තේරීම් භාර නිලධාරිවරයා විසින් එහි මුල් පිටපත රැගෙන යනවා දිස්ත්‍රික් තේරීම් භාර නිලධාරිවරයා ලඟට.
අපි දිස්ත්‍රික්කවල පිහිටුවලා තියෙනවා එක් එක් පළාත් පාලන ආයතනවල ප්‍රතිඵල සකස් කිරීමේ මධ්‍යස්ථාන. එතැනදි ප්‍රතිඵල ඔක්කොම එක් කරලා පළාත් පාලනයේ මුළු ප්‍රතිඵලය සකස් කරනවා. එතැනදි එක් එක් දේශපාලන පක්ෂය ලබා ගත් ආසන සංඛ්‍යාව තීරණය වෙනවා. ඒ වගේම සමානුපාතික නියෝජනය යටතේ එක් එක් දේශපාලන පක්ෂයට හෝ ස්වාධීන කණ්ඩායමට ලැබිය යුතු මන්ත්‍රී ධුර සංඛ්‍යාවත් තීරණය කරනවා. ඒ කරලා ඒ පළාත් පාලන ආයතනයේ අවසන් ප්‍රතිඵලය සකස් වෙනවා. ඒ ප්‍රතිඵලය මැතිවරණ කොමිෂන් සභාවට එවනවා. මැතිවරණ කොමිසන් සභාව විසින් අනුමත කළාට පසුව තමයි දිස්ත්‍රික්කයෙන් ඒ පළාත් පාලන ආයතනයේ ප්‍රතිඵලය ප්‍රකාශයට පත් කරන්නේ. ඒ එක්කම අපි බලාපොරොත්තු වෙනවා මාධ්‍ය ආයතනවලටත් ඒ ප්‍රතිඵලය නිකුත් කරන්න
ඒ වගේම අපි බළාපොරොත්තු වෙනව පළමු ඡන්ද ප්‍රතිපළය රාත්‍රි 11.00ට කළින් නිකුත් කරන්න අපි බලාපොරොත්තු වෙනවා."
